LAOAG CITY – Pursigido ti pamilya ti maysa kadagiti karaman iti maipagarop a panangdangran nga ireklamo ti maysa a mangisursuro iti pagadalan ti Ilocos Norte National High School ditoy ciudad ti Laoag.
Daytoy ket kalpasan a maipagarop a pinagsawsaw-an ni Miss Shela Marie Agcaioli dagiti adalan na kalpasan a natakwatan na dagitoy a mangmangan iti sango ti klasrum da.
Basar ti impormasyon, gapu ta nasapa da a nakadanon iti pagadalan ken nakarikep pay laeng ti klasrum da ket napanunutan da a napan gimmatang iti makan iti kantina iti nasao a pagadalan.
Gapu ta ammo dagiti estudyante a maiparit iti agiserrek iti makan iti klasrum da ket nagtalinaed da a nangan iti sango laeng iti klasrum.
Naamoan nga addan ti mangisursuro ken nakita na dagiti estudyante a mangmangan isut gapu na a pinagsawsaw-an na ken maipagarop a tinapis na dagiti maseknan.
Kabayatana, inbatad ti principal ti nasao a pagadalan a nasolbar dan iti nasao a banag.
