LAOAG CITY – Awan pulos ti simmango kadagiti mangisursuro ken uray ti principal iti Solsona National High School iti Barangay Man-anteng iti ili ti Solsona seknan ti alegasyon kontra ti maysa a mangisursuro ti nasao a pagadalan.
Daytoy ket pakaseknan ti maipagarop a panangibabain ti maysa a mangisursuro a ni Mrs. Maricel Alpar ti maysa nga estudyante a nakaibati ti bote ti sofdrinks iti ground ti pagadalan.
Naamoan a ti nasao nga estudyante ket taga Calanasan ken maipagarop a pinagsasawan pay ni Alpar ti saan a nasayaat ken maiparbeng a sarita kas ti panangawag na a taga-banbantay.
Ginandat ti bombo radyo nga alaen ti kabibiangan ni Alpar ngem nagkedked a simmango ti bombo radyo gapu ta maipagarop a makumikum.
Iti pay panagturong ti Bombo Radyo iti nasao a pagadalan ket awan ti principal a ni Jennifer Corpuz.
Nupay kasta, iti text messages nga inpatulod ni Corpuz iti Bombo radyo ket inpetteng na a masapol a sakbay nga ipatangatang dagiti reklamo iti Bombo Radyo ket iberipikar pay laeng nga umuna kadagiti maseknan.
Mainaig iti daytoy, inpeksa ti uliteg ti estudyante ti pungtot na gapu ti nakapay-an ti kaanakan na.
Inpetteng na a ti kas ken ni Alpar ket masapol nga iti Manila zoo ti pangisurwan na ken kuanana a dagiti mangisursuro ket isu ti maibilang a maikadwa a nagannak dagiti adalan da.
Inpalagip na pay nga awan ti naiyanak a siguden a nakabado ken kuna na a saan a gapu ta taga Calanasan da ket awanen ti karbengan da nga umay agnaed ditoy Ilocos Norte.
Reaksyon daytoy ti uliteg ti estudyante kalpasan a maipagarop a pinagsasawan ken inbabain ni Mrs. Alpar no sadinno nga inawagan na pay ti taga-banbantay ti ubing.
Kuna pay ti uliteg ti ubing a gapu ti panangawag ni Mrs. Alpar a taga-banbantay ti kaanakan na ket kinan-kantiyawan dagiti pada na nga ubbing.
kabayatanna, inabatd ti lola na a ni Eugenia Saldino, retirado a mangisursuro iti Calanasan, Apayao nga addan ti immuna a pannakabul-bully ti estudyante.
Nupay kasta, kuna na a dagiti immuna a pannakabul-bully ti apoko na ket saanna nga inkaskaso unay ngem gapu ta mismon a mangisursuro ti nangpabpabain ti ubing ket nasakit met ti rikna na.
Inpetteng na a 30 a tawen a nagisuro idiay Calanasan ken saan na pulos nga inar-aramid ti inaramid ti mangisursuro iti ili ti Solsona a ni Mrs. Maricel Alpar.
Kuna ni Saldino a saan a maiparbeng a pabpabainan dagiti mangisursuro dagiti adalan da.
Innayon ni Saldino a no adda ti estudyante a saan a nasayaat ti inaramid na idi mangisursuro pay laeng ket dagiti nagannak wenno guardian ti ubing ti mapan na kasarita.
