LAOAG CITY – Natay ti maysa a lalaki kalpasan a nalmes iti karayan a sakop ti Mount Mabilag gapo ti panangliklik na kadagiti uyukan idiay Solsona.
Nabigbig ti pimmusay a ni Orlando Tejada, addaan ti umno nga edad, awanan ti asawa, mannalon ken residente iti Brgy. Manalpac iti nasao nga ili.
Segun ti PNP Solsona, bayat ti panagala ti biktima ti “bilagot” iti nasao a karayan kadua na dagiti papagayam na ket kellaat a rimaot ti grupo dagiti uyukan.
Kuna ti PNP a gandaten kuma nga arayaten dagiti kakadua ti biktima ngem adda met dagiti uyukan a mangsilod kadakuada rason a pinanawan da ni Tejada.
Idi sublianan dagiti kakadua ti biktima, dita a nalmes daytoy gapo ti panagtapog na iti uneg ti danum tapno liklikan na dagiti uyukan.
Agtultuloy ti imbestigasyon dagiti otoridad mainaig iti daytoy a pasamak.
