LAOAG CITY – Inlawlawag ni Police Senior Inspector Eddie Suyat, chief of police ti PNP-Paoay ti panagbagkong ti menor de edad iti uliteg na idiay Barangay 26, Oaig-Upay iti nasao nga ili.
Segun kenni Suyat, bayat nga aggi-inom ti biktima a ni Oscar Agdeppa ken ti ama ti suspek a ni Renato Agdeppa ket agpinpinnalastog da senan iti maysa a banag.
Inbatad na nga aw-awisen ti menor de edad ti ama na nga agawid ngem gapo ta saan na a maayaban nga agawid ket maipagarop a nagpungtot rason ti panagkugtar na ti namin-dua a daras ti motorsiklo ti biktima.
Kunana nga idi nakita ti biktima ti inaramid ti kaanakan na a suspek ket inbarsak na ti naputed a kayo iti suspek ken natamaan daytoy a rason met a napan nangala ti kutsilyo ken binagkong na ti uliteg na.
Gapo iti daytoy, natamaan ti buksit, muging ken bukot ti biktima ken ita ket nagtalinaed pay laeng iti Mariano Marcos Memorial Hospital and Medical Center diay ciudad ti Batac.
Naamoan a ti suspek ket agtawen ti 15 ken Out of School Youth.
Nagtalinaed met iti kustudiyar ti PNP-Paoay ti suspek ket iyendorso da iti DSWD.
Agtultuloy met ti imbestigasyon dagiti otoridad ken birbiruken da pay laeng ti nausar a kutsilyo.
