LAOAG CITY – Natay ti maysa nga ubing kalpasan a nalmes iti karayan a paset ti Brgy. Lumbad idiay ili ti Dingras.
Nabigbig daytoy a ni Ian Jimenez Picoc, agtawen ti 13, out of school youth, mapapati nga adda ti deperensya ti panagpanpanunot, addaan ti epilepsy ken residente iti nasao a lugar.
Immuna iti daytoy, idi kalman ti bigat ket napan iti karayan ni Ian ken ti ina a ni Norma Jimenez Picoc, agtawen ti 69 tapno aglaba no sadinno a napan met nagdigus ti biktima.
Segun ti report, kalpasan ti maysa nga oras ket saanen a makita ti ina ti anak na ken iti panagbirbirok na ket nakita na ti bangkay biktima a tumtumpaw iti paset ti Caaplusan bridge iti nasao met laeng a barangay.
Naitaray ti biktima iti Rural Health Unit (RHU) iti nasao nga ili ngem naiyakar iti Dingras District Hospital ngem naideklara a dead on arrival.
Kabayatanna, inadmitir ti ina a saan na a nabaybay-an na ti anak na gapo ta makumikum iti panaglaba na.
