LAOAG CITY – Kinumpirmaran ni Police Chief Inspector Roldan Suitos, hepe iti PNP iti ili ti Sarrat ti pannakalmes ti maysa a menor de edad a lalaki iti San Joaquin Rivert Resort iti nasao nga ili.
Segun ken ni Suitos, kadwa ti saanen a nabigbig a biktima dagiti tallo a kasinsinna a napan nagdidigus ti karayan.
Inbatad na nga inpagarop dagiti agkakasinsin nga ababaw laeng ti napan da nagdidigusan ken saan da a ninamnama nga adda ti adalem a paset ti karayan.
Kuna na a dagiti agkakasinsin, pakairamanan ti biktima ket agpapada a residente iti Barangay 23 iti ili ti Sarrat.
Naitaray a dagus ti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem naideklara a dead on arrival.
Rumrumuar a ti nasao a biktima ket saanna nga ammo unay ti aglangoy ken maipagarop a saan da a nagpakada kadagiti nagannak da.
Gapu ti daytoy, inbalakad ni Suitos kadagiti menor de edad a no mapan agdidigus ti karayan ket masapol nga adda latta ti kadwa da a nataengan, wenno dagiti nagannak ken guardian da.
