LAOAG CITY – Nagballigi dagiti kameng ti PNP-San Nicolas iti inyuswat da a drug buy bust operation idiay Barangay 8, San Rufino iti ili ti San Nicolas, Ilocos Norte.
Nabigbig daytoy a ni Kevin Glenn Benemerito y Pascua, agtawen ti 26, awanan ti asawa, agtagikua ti vape shop ken residente ti Barangay 16, San Marcos iti nasao nga ili.
Segun kenni Police Chief Inspector Paul Benedict Parado, chief of police ti PNP-San Nicolas, natiliw ni Benemerito babaen ti pananggatang ti nagpammarang a police pusuer buyer ti maysa a plastic sachet a maipagarop a naglaon ti marijuana nga agbalor ti 500 a pisos.
Nakumpiskar dagiti otoridad ti 500 a pisos, dua a plastic sachet a maatap a naglaon ti marijuana, maysa a vape electronic cigarette, cellphone ken sling bag.
Inbatad ni Parado a nabayagen a sinipsiputan ti pulisya ni Benemerito sakbay a naoperasyonan gapo iti pannakainaig na kadagiti immunan a natiltiliw iti nasao met laeng nga ili.
Kabayatanna, nagkedked ni Benemerito a mangteg ti komento seknan ti panankatiliw na.
