LAOAG CITY – Natiliw ti maysa a negosiante gapu iti panaglabsing na iti RA 9165 wenno panagikot iti illegal a droga babaen iti naiyuswat a search warrant operation iti mismo pagtaengan na iti Brgy. Darayday, Laoag City.
Nabigbig ti suspek a ni Albert Patoc, addan iti umno a tawen, ken agnanaed iti nasao a Brgy.
Segun ken ni SPO3 Harold Nicolas Hepe ti Intelligence Div. ti PNP-Laoag, nabayagen a manmanmanan da ni Patoc sipud natiliw dagiti trabahdor na iti negosyo na iti panagibiyahe ti ikan gapu iti pammati nga adda da dagiti ilemlemmeng na a maipawil a droga.
Kas resulta ti nasao nga operasyon, naala dagiti pulis ti shabu a nakaikabil kadagiti nagduduma a sachet nga agdagsen iti agarup 17.5 a gramo nga agbalor ti nasurok a 175 a ribo a pisos.
Malaksid iti nasao a banag, nakaala da pay ti bala ti paltog a para iti 9mm ken m16.
Kabayatanna, saan a maakseptar ti pamilia na nga naaramid ni Patoc iti nasao krimen.
Iti agdama, addan iti kustudyar ti PNP-Laoag ti nasao nga suspek.
