LAOAG CITY – Kiniddaw ti maysa nga abugado iti Korte Suprema a mangiruar ti pammilin para iti alisto a panagtignay ti Senado iti impeachment kontra ken ni Vice President Sara Duterte.
Iti petition for mandamus nga inpila ni Atty. Catalino Generillo Jr. iti Korte Suprema, kiniddaw a mangiparuk-at ti writ of mandamus tapno dagiti Senador ket mangbukel ti impeachment court tapno insigida a marugian ti impeachment case nga inpila ti House of Representatives kontra iti Bise Presidente.
Immunan a naglikudan ni Duterte dagiti alegasion a pakairamanan dagiti iregularidad no kasano a nausar ti confidential funds a nailatang iti opisinana ken inpettengna a ti impeachment ket paset ti partisan politics.
Nangipeksa met dagiti sumagmamano nga abugado pakairamanan ti maysa a Senador ken maysa a dati nga Associate Justice ti Korte Suprema a mabalin a kasapulan ti Korte Suprema nga agdesision kadagiti isyu nga adda ti pakainaiganna iti impeachment a natalantan iti “forthwith” iti panangiwayat ti panagdengngeg kalpasan a naawat ti Senado ti articles of impeachment.
Inpetteng ni Generillo nga iti probision ti impeachment iti Konstitusion ket nausar ti “forthwith,” a kayatna a saoen ket “immediately,” “at once,” “instantly,” ken “straight away.”
Iti petision, inbatad ni Generillo a dagiti Senador ket saan met a makapaspasar ti aniaman a “disability, physical wenno mental” a manglaplapped kadakuada tapno mangiwayat ti impeachment court.
Kabayatanna, nailanad iti petision nga uray recess ti Kongreso ken Senado, mamati isuna a saan nga ipalpalubos ti Konstitusion nga itantan ti impeachment trial.
