LAOAG CITY – Nagkiddaw ti tulong manipod iti gobierno ti Pilipinas ni Mr. Maroof Malekyar, maysa nga Afghan national nga agnanaed idiay Kabul, Afghanistan.
Iti eklusibo nga innuman ti Bombo Radyo Laoag kenni Malekyar, inyestorya na ti agdama a sitwasyon da idiay Afghanista kalpasan a nasakupen ti Taliban ti nasao a lugar.
Segun ken ni Malekyar, naminpinsan a napukaw ti pagtrabahoan da ken arigna addan ti panagbisin gapu iti kinaawan a pamastrekan.
Inbatad na a sipod nasakop ti Taliban ti nasao a lugar ket saan a maipalubos nga agtrabaho dagitoy.
Mainaig iti daytoy, kuna na a narigat para kenkuana ken dagiti dadduma a pada na nga Afghan a pumanaw iti nasao a pagilian agsipod ta awan ti passport na ken dadduma pay a dokumento.
Malaksid iti dayta, inbatad na nga arigna buteng ken amak ti sangsangoen da iti inaldaw gapu iti posibilidad a mabalin a mapapatay dagitoy babaen kadagiti Taliban.
Immuna iti daytoy, kuna na a plano da ti agturong iti Pakistan ken nu ipalubos ti gobierno ti Pilipinas ti agawat kadagiti Afghans ket gundawayan na ti umay ditoy pagilyan.
Innayun ni Malekyar a dakkel ti panagyaman na iti Pilipinas nu bilang mapalubusan a makastrek dagitoy ditoy pagilyan.
