LAOAG CITY – Inlawlawag ni Brgy. Chairman Gil Ramos iti Brgy. 35, Gabu Sur ditoy ciudad ti Laoag a natiliw ti maysa a dakkel nga agila babaen iti banni-it ti maysa a mangalap.
Segun kenni Ramos, sinakbab ti agila ti nabanni-itan ti mangalap nga ikan rason a nairaman a nabanniitan ken gapo ta nabasa ket saan a nakatayab isut gapo na a naala da.
Inbatad na a dagiti nakatiliw ket isuda Brgy. Tanod Mario Padronan ken Edward Rumusod.
Immuna iti daytoy, kuna ni Ramos a gapo ti panagbuteng dagiti nakatiliw iti agila ket plano da nga ipatayab ngem linapdan na isuda tapno maipakkammo iti biang ti Department of Environment and Natural Resources (DENR) ken iti Bombo Radyo.
Mainaig iti daytoy, kuna ni Ramos a saan met nga agdangran ti nasao nga agila.
Naamoan a dua nga aldawen nga adda ti agila iti nasao a barangay ken nasaranta daytoy.
