LAOAG CITY – Inyistorya ni Mrs. Mercedez Lacambra, residente iti Barangay Tabug ken maysa a vegatable vendor iti merkado publiko iti ciudad ti Batac ti napasamak iti dandani na pannakatungpa babaen iti pada na nga aglaklako.
Segun kenni Lacambra, bayat nga isimsimpa na dagiti lako na ket maipagarop a dinarop isuna ti agnagan ti Edlyn Real no sadinno ket kinugtaran ti maseknan ti maysa a tugaw ken dandani natungpa ken nasulek ti mata na.
Inbatad na nga iti kinabayag na nga aglaklako iti nasao a merkado publiko ket ita laeng a mapadasan na ti kastoy.
Inpetteng ni Lacambra nga adda iti retailer section ngem maipapgarop a ni Real ket agpaspasangpet ti sangabagon a kamatis a rumbeng kuma nga adda iti bagsakan section.
Inpalgak na a gapo ta ado a kamatis ti maibagsak kenni Real ket agpalaka met iti presyo nga isu met ti rason a marigatan da a makalako ngem inanusan na daytoy iti uneg ti dua a bulan nangruna ket awan ti karbengan na a mangiparit no anya ti kayat a presyo dagiti aglaklako.
Inakusaran pay ni Lacambra ti market supervisor a saan a patas ti trato na ken maipagarop nga awan ti panangisakit na kadakuada a retailer.
Gapo iti daytoy, nagsurat isuna iti opisina ti Mayor mainaig iti daytoy ken naipaima iti Barangay Naguiragan ti panagsasarita.
Kunana nga imbes kuma nga agpabakumbaba ni Real ket maipagarop nga isuna pay ti mangikeddeng no anya ti rumbeng a mapasamak.
Inkarigatan ti Bombo Radyo Laoag nga alaan ti komento ni Real ngem saan a nagpakita daytoy iti news team.
Maiyuswat ti sumaruno a panagsasarita da intono bulan ti Disyembre.
Kabayatanna, kalikagom ni Mr. Domingo Garcia, ti Marker Supervisor iti merkado publiko iti ciudad ti Batac a masolbar ti isyu iti nagbaetan ni Mrs. Mercedez Lacambra ken Edlyn Real.
Segun kenni Garcia, awan ti pabpaboran na kadagiti aglaklako wenno patas ti panangtrato na kadagitoy.
Inlawlawag na a kalpasan a dimmanon iti opisina na ti napasamak ket nagsina a pinaayaban na dagiti dua a maseknan tapno agpalawag.
Inlawlawag na a kalpasan daytoy ket in-set na ti panagsango da Lacambra ken Real ngem saan a nagparang ti maysa kadagitoy.
Inpetteng na nga ura kasano ti ayat na a masolbar ti isyu ket awan ti maaramidan da no adda kadagiti dua ti saan nga agpakita.
Kunana a namunganay ti nasao nga isyu iti nalaka a presyo ti kamatis.
Mainaig iti daytoy, kuna na a no adda ti sursuruten da a no nabakante ti maysa a pwesto ket maikkan ti posting a “open space for rent” daytoy ken kalpasan ti sangapulo nga aldaw ket ado dagiti nagaplikar, mabunot ti nagan no siasinno ti mangakupar iti daytoy.
Kinumpirmaran pay ni Garcia nga idi nagpwesto ni Real iti nasao a lugar ket saan pay a nakabayad ti lisensya na ngem manarimaan ti pannakaiproseso dagiti dokumento iti dayta a gundaway, ngem kadagitoy ket legal ti panagpwesto ni Real.
Inpetteng na nga awan ti isyu iti naladaw a pannakabayad ni Real gapo ta adda met ti multa a maipataw a rumbeng a mabayadan.
Kabayatanna, kuna ni Garcia nga inadmitir met ni Real a nagbasol iti panangdarop na kenni Lacambra.
