LAOAG CITY – Maluksaw ti maysa a fish vendor a nakapuesto iti maysa a talipapa iti paset ti Barangay Buttong a ni Mrs. Dominga Borja a taga Barangay Lapaz ditoy ciudad ti Laoag.
Daytoy ket gapo ta ti naibayad kenkuana sangaribo a pisos ket peke.
Segun kenni Mrs. Borja,saan na a dagos a nakita no peke ti kwarta a naibayad kenkuana gapu ta ado ti customer a laklakwan ken kasarsarita na iti dayta a gundaway.
Nupay kasta, kunana a dagiti nasao a customer ket agina, ken gimmatang dagitoy ti boneless bangus nga agbalor ti 130 a pisos.
Kuna ni Mrs. Borja a sinuplian na pay daytoy ti 870 a pisos.
Inlawlawag na nga iti isina na ti pagyanan dagiti sangribo a pisos a naglakwan na ket nakita na a napigis ti 1000 peso bill gapu ta nabasa ti ima na.
Kabayatanna, kunana saan a daytoy ti umuna a gundaway nga adda nagbayad kenkuana ti peke a kuarta.
