LAOAG CITY – Patien ti maysa a Makabayan lawmaker a ti peace rally ti Iglesia ni Cristo ket maysa a wagas tapno mailiklik ni Bise Presidente Sara Duterte iti responsibilidad na nga agsungbat iti isyu na seknan iti kurapsion.
Daytoy ti reaksion ni ACT Teachers Partylist Representative ken House Deputy Minority Leader France Castro iti peace rally ti Iglesia ni Cristo ita nga aldaw.
Kinuna ni Castro, naplano a nalaing ti dakkel a panagtitipon tapno masalakniban ti Bise Presidente iti kwestsyunable a pannakausar ti 2022 ken 2023 confidential funds ti Office of the Vice President ken Department of Education idi sekretario pay laeng daytoy.
Inpaganetget ni Castro nga uray adda rally a naisayangkat ket saan a mailimed ti kinapudno a masapul nga agsungbat dagiti opisyal ti gobierno iti aramidda.
Segun kenkuana, naruay dagiti agkidkiddaw iti hustisia ken panagsungbat, saan ketdi a maipadalan iti “political theatrics”.
Inpetteng ni Castro a saan a pulos a magun-od ti kinatalna no awan ti hustisia.
