LAOAG CITY – Kalikagum ni Mrs. Modesta Corazon Llaguno Cacayorin, maysa nga agpapaay iti RHU Paoay a malawlawagan ti panag-isolate na kalpasan a negatibo ti rimuar a resulta ti swab test na.
Immuna iti daytoy, inyestorya ni Cacayorin a dimmalan iti swab test idi Hulyo 12 kalpasan nga adda ti nagpositibo iti covid-19 a katrabahoan na.
Inbatad na a kalpasan ti tallo nga aldaw ket tinawagan ti municipal health officer ken dita a naamoan na a nagpositibo iti virus.
Gapu iti daytoy, kuna na a babaen iti mandar ti municipal health officer ket dagus a nasukon ken naipan iti mothering center iti ili ti Paoay tapno isu ti pangileppasan na ti 14-day isolation.
Inpakaammo na a malaksid ti 14-day isolation ket pito nga aldaw pay a dimmalan iti home quarantine rason nga idi laeng Agosto 3 a nakaruar.
Mainaig iti daytoy, kuna nga apaman a nalpas na ti panagquarantine ket napan iti munisipyo tapno mangala kadagiti dokumento pakairamanan ti resulta ti swab test.
Nu pay kasta, inbatad ni Cacayorin a naala na laeng ti kopya ti swab test result na idi Agosto 12 ken dita a nakita a negatibo daytoy.
Immunan nga inpakaammo ni Cacayorin a basar iti palawag ti municipal health officer kenkuana ket naibaga a positibo daytoy basar iti listaan nga inparuk-at ti Mariano Marcos Memorial Hospital and Medical Center iti siudad ti Batac.
Kabayatanna, saan met pay a nakaited ti naan-anay a reaksyon ti municipal health officer iti ili ti Paoay gapu ta addaan daytoy ti agdama a mapaspasaran a sakit.
