LAOAG CITY – Inaprobran ti Sangguniang Panlalawigan ti resolusyon para ti pannakairekomendar a mapatawan ti kaso administratibo wenno reklamo kriminal kontra ti Venvi Agro-Industrial Corporation.
Daytoy ket gapu iti panagsalungasingna iti Republic Act No. 9275 wenno Philippine Clean Water Act of 2004.
Basar iti surat ti DENR-EMB Regional Office 1, nagsalungasing ti nasao a korporasiyon kalpasan iti naiyuswat a water sampling iti Nagabungan Creek a maipagarup a pakaipapaayusan ti rugit manipud iti pagtaraknan ti manok ken baboy ti nasao a korporasiyon.
Immuna iti daytoy, adda ti naidanun a reklamo iti Office of the Barangay Affairs ditoy probinsya mainaig iti nabangsit nga angot iti aglawlaw gapu kadagiti rugit nga aggapo iti nasao a kompanya.
Gapu iti daytoy ket nagturong dagiti kameng ti EMB ket nangala da ti water sample ken inpatulod da iti Regional Office ken saan a pimmasa daytoy.
Nairekomendar ti panangipasa ti Sangguniang Panlalawigan ti pannakasuspenso ti Environmental Compliance Certificate kontra ti nadakamat a kumpanya.
Naamoan nga adda ti naipatulod a notice of violation iti Venvi Agro Industrial Corporation.
Maipalagip a tawenen ti napalabas sipod nangrugi a timpuar daytoy a problema dagiti sumagmamano a residente iti San Nicolas gapu ta naapektaran ti panagbiagda ken pagsapulanda gapu ti rugit a maipapaayos iti nasao a waig.
