LAOAG CITY – Inpeksa ni Mr. Ruben Marcelino, maysa kadagiti agtartaraken ti baboy iti ili ti Solsona ti sakit ti nakem na gapo iti maipagarop nga awan pulos ti natungpal kadagiti kari ti Municipal Agriculture Office iti nasao nga ili.
Rakurak na daytoy kabayatan ti regular session ti Sang. Bayan iti ili ti Solsona.
Segun kenni Marcelino, idi bulan ti Hunyo a panagraira ti African Swine Fever (ASF) ditoy probinsya ken pannakai-cull dagiti taraken a baboy, adda ti saritaan da ken naikari kas iti pannaka-disinfect ti ubong ti baboy iti mamindua a daras iti maysa nga aldaw, ken dadduma pay.
Inpetteng na a naikali dagiti taraken na a baboy ngem awan met ti sinurot ti MAO kadagiti saritaan da.
Malaksid iti daytoy, inakusaran na pay a napili laeng ti naikkan ti insurance wenno tulong manipud iti PCIC.
Kunana a kalpasan ti tallo a bulan ken saan pay a naaramid ti napagsasaritaan da, bukod nan a kwarta ti ginastos na para iti pannaka-disinfect ti ubong ti baboy na.
Innayon na a gapo iti napasamak ket arig na napukawen ti pammati wenno talek na iti Municipal Agriculture.
kabayatanna, naglikudan ni Engr. Ranieson Narciso, Municipal Agriculturist iti ili ti Solsona ti alegasyon ni Mr. Ruben Marcelino a saan da a napan nagdisinfect kadagiti barangay nga apektado ti ASF.Segun kenni Narciso, kalpasan ti culling operation, nagturong ti disinfection team kadagiti barangay nga apektado.
Nupay kasta, kuna ni Narciso a saan nga inpalubos ni Marcelino a makastrek ti grupo dagiti ag-disinfect gapo iti amak na a maapektaran dagiti taraken na a manok.
Inpetteng na a saan pay a nabayag sipud nangiyuswat da ti culling operation ken maipagarop a nangiserrek ni Marcelino a baboy a rumrumuar nga isu ti mabalin a prinotektaran na.
Kunana a basar iti guidelines ti Dept. of Agriculture (DA), saan a mabalin nga agtaraken ti baboy iti uneg ti piggery tapno masurot met laeng ti target a re-population.
Inlawlawag na nga iti laksid daytoy ket adda dagiti sumagmamano a barangay nga agtartaraken ti baboy a nagilibas a nagiserrek, saan pay unay a nabayag sipud naikali dagiti apaktado a taraken.
Inpalgak na nga agingga nga adda ti kastoy nga aramid ket saan nga agbalin ng ASF Free Municipality ti Solsona wenno kadagiti barangay.
Innayon ni Narciso a saan pay a mabalin nga agtaraken ti baboy iti uneg ti 500 meter radius kas basar iti guidelines.
