LAOAG CITY – Natay ti maysa nga ama kalpasan a nagbekkel iti paset ti Barangay Sumader iti ciudad ti Batac.
Segun ken ni Police Lt. Col. Adrian Gayuchan, ti chief of police iti ciudad ti Batac, ti biktima ket agtawen ti 53, ken residente metlaeng iti nadakamat a barangay.
Inbatad ni Gayuchan a basar iti imbestigasyon da, nakariing ti asawa ti biktima iti oras ti alas-singko ti bigat ken ditoyen a nakita na a nakabitin ti asawa na iti likud ti balay da babaen iti panagusar na ti nylon cord.
Intawag met a dagus ti asawa na iti Philippine National Police iti napasamak ken iti panagresponde dagiti otoridad iti lugar ket naibaban ti bagi ti biktima.
Inpakaammo ni Gayuchan a mismo a ti Municipal Health Officer ti nangideklarar a pimmusayen ti nasao nga ama.
Kuna na a basar iti pamilya ti biktima, daytoy ti damo nga inaramid ti nasao nga ama ti nangkettel ti biagna ken ti rumrumuar nga agpaspasar ti depresyon gapu ta adda ti problema na naionggep iti salun-at na.
Kabayatanna, inbalakad ni Gayuchan a no adda iti problema ket masapol nga iyuman iti pamilya ken dadduma a mabalin a makatulong tapno maliklikan iti kastoy nga insidente.
