LAOAG CITY – Addan iti natalged a kondisyon ti maysa nga ama a biktima ti pammaltog iti Barangay Pagsanahan Sur iti ili ti Badoc.
Binigbig ni Police Major Joseph Tayaban, chief of police ti PNP-Badoc ti biktima a ni Rodolfo Tacmo Jr., residente iti Sitio Paratong, Barangay Saud iti nasao nga ili.
Iti imbestigasyon dagiti otoridad, ti biktima ket kadua na ti asawa ken anak na ken mapan da mangan iti Barangay Pagsanahan Sur iti nasao nga ili partikular kadagiti cottages nga adda iti igid ti baybay.
Segun pay kenni Tayaban, idi bimmaba ti biktima ken ti pamilya na manipud iti nagluganan da a motorsiklo ket ditoy a pinaltogan dagiti suspek daytoy a nakatamaan ti akin-kannigid a luppo na.
Inlawlawag na a nagtaray ken napan nagpaarayat ni Tacmo ken kinamat dagiti suspek ngem dagus a nakalemmeng daytoy a nangitunda met ti panaglibasen dagiti suspek a nagturong iti abagatan a direksyon ken nakalugan dagitoy ti nangisit a Pinoy 125 a motorsiklo.
Dinakamat na a saan met a naan-ano ti asawa ken anak ti biktima.
Kinumpirmaran pay ni Tayaban a nabigbig ti biktima ti suspek ken idi kalman ket naaddaan dagitoy ti riri wenno saan a panagkinnaawatan.
Nakarekobre met dagiti otoridad ti lima a kapsula ti kalibre 45 a paltog iti nakapasamakan ti pammaltog.
Agtultuloy met ti naun-uneg nga imbestigasyon dagiti otoridad iti nasao a pasamak.
