LAOAG CITY – Inyestorya ni Mr. Lawrence Famorca iti Brgy. Mandaloque iti ili ti Dingras ti napasamak iti panagturong da iti Dingras District Hospital para iti pannakataming ti anakna.
Segun ken ni Famorca, immuna a napastrek ti asawa na ken ti anakna iti ospital.
Nu pay kasta, pimmanaw isuna tapno mapan mangipamuspusan ti kwarta nga usarenda iti ospital.
Kuna na nga iti panagsubli na iti ospital ket nakita na ti agina na nga adda iti ruar ken dita a dinamag na nu ma-admit ti anak da.
Nu pay kasta, inbaga na a basar iti inpakaamo ti asawa na ket dinamag da nu adda ti kwarta da ngem awan ti insungbat na isut gapu na a rimuar da ken inawis na lattan nga agawid da.
Gapu iti daytoy, kuna ni Famorca a nakapungtot iti dayta a gundaway gapu ta arig na aglusdoy ti annak nan gapu iti panagsarsarwa ken panagsakit ti buksit na ngem maipagarup a saan nga inasikaso ti ospital.
Inpakaamo na a nagturong da iti Dingras District Hospital iti pasado alas otso ti bigat ngem agingga iti alas dose ti aldaw ket saan a pulos a nataming ti anakna.
Inbaga na a kalpasan a saan a nataming ti anak na ket nagawid da ken kalpasan na ket nagturong da metlaeng iti Piddig District Hospital.
Kuna na a dita a dagus a naakomodar ti anak na ken awan maysa oras ti napalabas sakbay a na-admit.
Immuna iti daytoy, adda ti naipakaamo iti Bombo Radyo Laoag a maipagarup a saan a nataming ti anak ni Famorca ken maipagarup a dinamag ti doktor nu adda kwarta da tapno ma-admit.
Kabayatanna, naglikudan ni Dr. Catherine Damaso iti Dingras District Hospital ti alegasyon a saanda nga inakomodar ti anak ni Mr. Lawrence Famorca.
Inlawlawag na nga idi manarimaan ti pannakaiproseso ti pannaka-admit ti ubing ket inbaga ti ina na a mapan da pay laeng iti ruar tapno urayenda ni Mr. Famorca.
Kuna na nga inbaga da pay iti ina a mabalin na pay laeng nga ipa-idda ti anak na kabayatan nga agur-uray da ngem rimuar da.
Inbaga na nga idi batang ti ubing a maad-mit ket saan dan a nabirokan daytoy.
Mainaig ti daytoy, kuna na nga awan dagiti dawdawaten da a dokumento tapno laeng ma-admit ti pasyente ken saanna a pulos a dinamag nu adda ti kwarta dagiti maseknan.
Innayun na a maymaysa isuna a naka duty a doktor iti dayta a gundaway ken ado dagiti pasyente.
