LAOAG CITY – Maysa nga ama iti ili ti Pinili ti naarestar gapu iti kaso a panagsalungasing ti RA 9262 wenno ti Violence Against Women and their Children.
Segun ken ni PMSgt. Noel Gamit, ti Chief Investigator iti PNP Pinili, naarestar ti akusado babaaen ti warrant of arrest nga inparuk-at ni Hon. Maribel Mariano Ariola iti RTC Branch 17 iti siudad ti Batac.
Inbatad ni Gamit a ti akusado ket residente iti Brgy. Pugcaoan iti ili ti Pinili ngem naarestar iti Brgy. Tabug iti siudad ti Batac nga isu ti pagpapaayan daytoy kas construction worker.
Inlawlawagna a basar iti imbestigasyon, adda iti impluwensya ti nasanger ti akusado idi nadangranna ti agtawen ti siyam nga anak na a babai partikular iti panangdanog na iti likod ti lapayag daytoy.
Gapu iti daytoy, kuna ni Gamit a naipan pay iti ospital ti anakna.
Nagtalinaed iti kustodyar dagiti otoridad ti akusado bayat a maisagsagana ti maipila a kaso kontra iti daytoy.
