LAOAG CITY – Nagbekkel ti maysa nga ama iti uneg ti pagtaengan iti ili ti Bangui.
Binigbig P/Cpt. Marlon Lorenzo, hepe ti Philippine National Police iti nadakamat nga ili ti biktima nga agtawen ti 31, addaan ti live in partner, aggatgatang kadagiti bote ken landok ken residente iti nadakamat a lugan.
Basar iti imbestigasion, nakita dagiti karruba ti biktima a nakabitin pay laeng daytoy iti uneg ti pagtaenganna.
Immunan iti daytoy, ket nagsinnungbat ti biktima ken ti live in partner-na nga agtawen ti 23, ken residente iti ili ti Bangui no sadinno kalpasan iti daytoy ket nagtalaw ti biktima iti pagtaenganda ken nag-ininum ti arak a nagmalmalem.
Nammoan nga immunan a naagturong ti biktima iti sementeryo tapnu kitaen ti pimmusay a balasitangna.
Mainaig iti daytoy, arigna nagpakpakada pay ti biktima kadagiti karrubana sakbay iti napasamak nga insidente.
Kabayatanna, awan ti nakita dagiti otoridad a foul play iti pannakapatay ti biktima ken maibilang a nasolbaren ti kaso.
