LAOAG CITY – Nagpakamatay ti maysa a lalaki babaen ti panagbekkel na iti poon ti kayo ti salamagi idiay Brgy. 11 Bulbulala, Vintar, Ilocos Norte.
Nabigbig ti biktima a ni Edwin Abener y Cristobal, agtawen iti 59, naasawaan ken residente met laeng ti nasao a barangay.
Iti imbestigasyon, napan iti kabanbantayan a paset ti lugar ti anak ti biktima a ni John Lester Abener y Gaspar, agtawen iti 24 tapno mapan agala iti root idi nagtaol-taol ti aso na.
Nakigtot laengen ti ubing nga Abener idi nakita na ti ama na a nakabitin iti kayo ti salamagi.
Naamoan a ti biktima ket agsagsagaba iti hypertension ken pimmanaw iti balay da iti oras iti alas-diyes ti bigat idi lunes, nobyembre 5, agingga a nakita na laengen daytoy a nakabitin.
Inpasingked ni Dr Haidee Albano iti Municipal Health Unit iti ili a Vintar nga awan ti foul play iti pannakatay ti ama nga Abener.
