LAOAG CITY – Nagpatulong ditoy Bombo Radyo Laoag ti maysa a Mister kalpasan a naamuan a marigrigatan iti trabaho ken masaksakit ti asawa na nga adda idiay Riyadh, Saudi Arabia.
Nabigbig ti Mister a ni Orlando Villa, tubo ti Pamplona, Cagayan idinto a ti Mrs. na ket ni Analiza Villa, agtawen ti 37 ken tubo ti Bgy. Mumulaan iti ili ti Paoay.
Segun ken ni Mr. Villa, ag-tallo a bulan pay laeng ti Misis na ngem marigrigatanen iti trabaho a kas katulong gapu ta dua a pamilya ti serserbiyan na ken maturog laengen daytoy iti oras ti ala una y media iti parbangon ken agriing iti oras ti las singko iti parbangon.
Kuna ni Mr. Villa nga adda gundaway a kinuyog ti amo na ti asawa na iti agency a nangipatulod kenkuana gapu iti panagreklamo na ngem imbes a nakatulong ket inung-ungta na pay daytoy ken nagpangta a no kayat nan ti agawid ket masapul nga agbayad iti 90 a ribo a pisos kasukat iti nagastos na iti pannakaipatulod idiay Saudi.
Naamuan na ti agdama a sitwason ti asawa na babaen iti messenger a no sadino nga addaan tallo a lawas a masaksakit daytoy ken kayatnan ti agawid.
Mainaig iti daytoy, insigida a kinuyog ti Bombo Radyo – Laoag ni Mr. Villa iti opisina ti Overseas Workers Welfare Admi nistration (OWWA) iti Ilocos Norte.
Daytoy ket tapno maamuanda no ania ti problema ti asawa na a ni Annaliza Villa nga adda idiay Riyadh, Saaudi Arabia nga agserserbi a katulong.
Segun iti OWWA, makaala da la ketdi kadagiti impormasyon a kasapulan da panggep ti asawa ni Mr. Villa ket insigida a makikoordinaran da kadagiti kakadua da iti Region para iti pannakaidanon iti central office ti opisina da.
Kuna da a no adda iti kastoy a problema ket maikoordinar iti Embahada ti Pilipinas idiay Saudi Arabia ken iti Agency a nangipatulod iti daytoy.
