LAOAG CITY – Nadiskubre ti bangkay ti maysa nga American Citizen, agtawen 71, awanan asawa ken residente iti Barangay 4, Don C Peralta St., ditoy ciudad ti Laoag.
Iti imbestigasion ti Philippine National Police ditoy ciudad ti Laoag, agarup 11:00 ti bigat idi kalman, Abril 14, nagturong ti maysa a delivery rider iti apartment ti biktima tapno ideliber ti parcel na ngem saan a sumungsungbat daytoy.
Gapu iti daytoy, pwinersa ti landlord iti apartment a linukatan ti ridaw ti kwarto ti biktima ket ditoy a nakita da a nakaidda iti datar ken saanen nga agang-ages pay.
Nangisayangkat ti Ilocos Norte Provincial Forensic Unit 1iti ocular inspection iti apartment ti biktima, ngem awan ti pagilasinan ti napasamak a kinaranggas ken awan dagiti nadadael wenno napukaw a personal a kagamitan ti biktima.
Iti panangeksamen ni Dr. Precious Lim iti Laoag City Health Office iti bangkay ti biktima ket awan ti nakita a pagilasinan ti physical inflicted injury ken ti naduktalan a rason ti pannakatay na ket gapu iti Acute Myocardial Infarction, ken addan ti agarop 4 nga oras a natay ti biktima sakbay a nadiskubre ti bangkay na.
Inpakaammo met ni Fenelyn Arellano Salva, ti caregiver ti biktima, a ti nasao nga American citizen ket agsagsagaba ti hypertension.
