LAOAG CITY – Inbutaktak ni ABC President Mikee Fariñas ditoy ciudad ti Laoag ti naawat na nga impormasyon mainaig iti panangtratar ti Department of Public Safety (DPS).
Segun kenni Fariñas, idi Nobyembre 4 ket inasistiran dagiti opisyal ti Barangay 16 ti agtawen ti 14 a residente gapo iti panagbakwar na ti dara.
Inlawlawag na a timmawag dagiti opisyal ti barangay iti DPS tapno agkiddaw ti ambulansya ngem maipagarop nga inbaga ti nakasarita da iti telepono a maymaysa ti ambulansya ti departamento ken saan nga emerhensya ti sagsagabaen ti menor de edad.
Gapo iti daytoy, kalikagom ni Fariñas nga adda ti kameng ti DPS a mangipalawag iti nasao a pasamak.
Kabayatanna, inpetteng ni Mr. Nick Daquioag ken dagiti kakadua na idi Nobyembre a saan a bugat no diket pasado alas-dos a nakaawat da ti tawag nga agkidkiddaw ti ambulansya.
Inbatad na a a saan pay a naibaga kadakuada a ti maitaray iti ospital ket agbakbakwar ti dara no diket ti laeng naibaga ket agkapsot daytoy.
Rumrumuar pay a ti menor de edad ket taga Barangay Buttong ditoy ciudad ti Laoag ken ti kaasitgan nga ospital ket iti LCGH ngem ti maipagarop a kalikagom ti ubing ket iti Mariano Marcos Hospital and Medical Center iti ciudad ti Batac.
Naamoan pay ti Bombo Radyo Laoag nga iti bigat ti Nobyembre 4 ket napan nagpachekc up iti LCGH ken naikkan ti referral para iti pannakaagas na iti ospital iti ciudad ti Batac ngem rumrumuar a saan a naideretso gapo ta iti malem ti naikiddaw a pannakaitaray daytoy.
Malaksid iti daytoy, naamoan pay a naibaga nga iti laeng ambulansya ti Red Cross ti mausar ngem maipagarop a saanen a nagtawag ti operator iti kadua ti pasyente wenno kadagiti barangay officials.
Mainaig iti daytoy, kuna ni Police Chief Master Sergeant Ferdinand Santos, mangidadaulo ti nasao a departamento nga addan ti inisyu na a memorandum iti operator tapno agpalawag.
Innayon na a silulukat met ti DPS nga agsungbat wenno agpalawag iti Sang. Panlungsod manaig iti daytoy.
