LAOAG CITY – Nasugatan ti saka ti maysa nga estudyante a babai, agtawen ti 18 ken agad-adal iti Northwestern University kalpasan a nadungpar ti maysa a tricycle iti paset ti Barangay 50, Buttong ditoy ciudad ti Laoag.
Segun iti nangiturong ti tricycle a ni Mr. Jimmy Berbano, saan a napataray ken inpagarop na a saan a bumallasiw iti kalsada kangrunaan na iti pedestrian lane ti biktima ken dagiti kakadwa na a pada na metlaeng nga estudyante.
Ti insidente ket napasamak a mismo iti sango ti nadakamat a pagadalan.
Naamoan a ti tricycle ket mapanna koma itulnog dagiti tallo a pasahero na idi napasamak ti insidente.
Mainaig iti daytoy, dagus a napan napaagasan ti biktima iti Governor Roque Ablan Senior Memorial Hospital and Medical Center ditoy ciudad ti Laoag.
Agtultuloy pay laeng iti imbestigasyon ti Philippine National Police iti nasao a napasamak.
