LAOAG CITY – Natay ti maysa nga estudyante iti pannakadesgrasya ti dua a motorsiklo iti Vintar Road, bisinidad ti Barangay 55-B, Salet-Bulangon ditoy siudad ti Laoag.
Nabigbig ti biktima a ni John Rick Sales y Calzada, agtawen ti 21, estudyante, baro ken residente iti Barangay 16, Salsalamagui iti ili ti Vintar.
Iti imbestigasyon dagiti otoridad, agpapa-abagatan ti biktima a nakalugan ti motorsiklo ken adda ti sarsarunwen na a maysa met laeng a motorsiklo nga inturong ni Romy Dalipe, agtawen ti 63, naasawaan ken residente iti Barangay 55-B, Salet-Bulangon ditoy siudad ti Laoag.
Nupay kasta, idi makadanun dagiti maseknan iti nakapasamakan ti insidente ket ginandat ti biktima ti agovertake ken ni Dalipe ngem nasapgud na ti manibela ti naud-udi a nangitunda ti pannakabatog da no sadinno a naipaayas ni Sales iti agarop 63 nga addang.
Naitaray ni Sales iti Governor Roque Ablan Senior Memorial Hospital ditoy ciudad ti Laoag ngem naideklarar a pimmusayen idinto a nagsagaba met ti sugat ni Dalipe ngem nagkedkeden a maipaagas iti ospital. Mainaig iti daytoy, naduktalan a ni Dalipe ket awan ti lisensya na nga agmaneho isut gapuna a naiyisoan ti citation ticket.
