LAOAG CITY – Nabagkong ti maysa a Grade 8 student iti Dingras National High school babaen iti pada na met laeng nga estuyante ti Grade 9.
Segun kenni Mr. Jay Lagatero, ti Head Teacher III iti nadakamat a pagadalan, iti inisyal a nakalap da nga impormasyon ket napasamak ti insidente kabayatan ti break time dagiti estudyante ken rumrumuar a datin nga adda ti susik iti nagbaetan dagiti dua nga agad-adal.
Inlawlawag na a dagus da met a naanawa dagitoy ken ti biktima ket naitaray iti Dingras District Hospital ngem naiyakar iti Mariano Marcos Memorial Hospital and Medical Center iti ciudad ti Batac ken conscious met daytoy.
Inbatad na nga adda ti iyus-uswat da nga Operation Kapkap kadagiti estudyante ngem naiserrek latta ti suspek ti immuko nga inusar na gapo ta inlemmeng na daytoy iti pribado a paset ti bagi na.
Kabayatanna, ti suspek ket nagtalinaed iti kustudiyar ti Philippine National Police iti ili ti Dingras bayat nga agtultuloy ti imbestigasyon da.
Innayon ni Lagatero nga imbestigaren da daytoy tapno saanen a maulit pay.
