LAOAG CITY – Natiliw ti maysa nga estudyante iti niayuswat a drug buy bust operation babaen iti PDEU ken PNP-Sarrat iti Barangay 4 iti nasao nga ili.
Nabigbig ti subject ti operasyon a ni Rene John Almonte y Agcaoili, agtawen ti 23 ken residente iti nadakamat a barangay.
Nakumpiskar kenni Almonte ti pitaka nga adda iti bulsa ti short na a naglaon ti 11 a babassit a sachet ti maipagarop a shabu, kwarta.
Naglikudan ni Almonte a kukua na dagiti naala a maipagarop a shabu kenkuana gapo ta sakbay daytoy ket kaririing na ken adda pay laeng iti uneg ti pagtaengan da.
Inpetteng ni Almonte a saan a pulos a nagus-usar wenno naglaklako ti droga ken naglikudan na a kabkabilen na ti baket a tumaktakder nga ina na no mabartek isuna.
Kabayatanna, kuna ni Barangay Chairman Felix Hermano a ti subject ti operasyon ket adda ti rekord na iti barangay gapo iti maipagarop a panangkabkabil na iti ina na.
Inbatad na nga aglitlitem pay ti nagduduma a paset ti bagi ti ina ni Almonte gapo iti maipagarop a panangkabkabil na iti daytoy.
Innayon ti kapitan a saan na a patyen a maaramid ni Almonte ti panangkabil iti ina na no saan nga adda iti impluwensya iti droga.
