LAOAG CITY – Nasugatan ti maysa nga estudyante kalpasan a binagkong ti pada na metlaeng nga estudyante iti Ilocos Norte National High School (INNHS) ditoy ciudad ti Laoag.
Basar iti ina ti suspek, kanayun nga ibagbaga kenkuana ti anakna nga adda ti grupo a mangbulbully kenkuana gapu iti babai isut gapuna nga adda latta ti isagsagana na a ballpen.
Nupay kasta, saan da a ninamnama nga adda ti iggem ti suspek a kutsilyo no sadinno a maipagarop a kalpasan ti pammagkong ket adda ti nangiyawatan na ti inusar na a patadem.
Kuna pay ti ina ti suspek, sakbay iti pammagkong ket rumrumuar nga adda dagiti nangtengngel iti suspek bayat nga ur-urayen na ti sundo na a nagresulta ti maipagarop a panagpungtot nan isut gapuna a nabagkong na ti biktima.
Nupay kasta, saan pay a masinunuo no ti nabagkong ti suspek ket isu ti nangbully kenkuana.
Iti agdama ket manarimaan a maag-agasan ti biktima iti Mariano Marcos Memorial Hospital and Medical Center iti ciudad ti Batac ngem naipasigurado nga adda iti natalged a kasasaad.
Agpapan maisursurat daytoy a damag ket saan pay a masinunuo no ania a paset ti bagi ti biktima ti nabagkong.
Agtultuloy ti imbestigasyon ti Philippine National Police ditoy ciudad ti Laoag mainaig iti napasamak a pammagkong.
