LAOAG CITY – Maisagsaganan ti kaso a maipila kontra iti subject ti naiyuswat a drug buy-bust operation iti Brgy. 2, Sta Joaquina ditoy ciudad ti Laoag.
Ti subject ket agtawen ti 18, maysa nga estudyante ken maibilang a drug watch list personality, tubo iti Navotas, Manila ken agdama nga agnanaed iti Brgy. 1, San Lorenzo, Laoag City.
Maipagarop a naglako ti subject ti maysa a sachet a naglaon ti maatap a napagango a bulong ti pagilyan, tangkay ken bukel na iti police poseur buyer.
Nakumpiskar dagiti otoridad manipud iti subject maysa a sachet a naglaon ti maipagarop a napagango a bulong ken bukel nga agdagsen ti 1.6 grams nga agbalor ti sangaribo a pisos nga isu ti ginatang ti police poseur buyer.
Karaman pay ti black coin purse a naglaon met laeng ti maysa a sachet a naglaon ti maatap a napagango a bulong ti pagilyan, tangkay ken bukel nga agdagsen ti 2.0 grams; personal a kwarta na a 250 a pisos, maysa nga sling bag a naglaon ti cellphone, balisong ken dadduma pay a personal a kagamitan na.
Naamoan a ti kabuklan a kadagsen ti naala a maipagarop nga iligal a droga iti subject ket 3.6 grams ken agbalor ti 432 pisos.
Iti agdama, adda iti kustudiyar ti pulisya ti subject ken mapilaan ti kaso.
