LAOAG CITY – Balligi a naarestar dagiti kameng ti Philippine National Police ti maysa nga estudyante a lalaki babaen iti naisayangkat nga Anti-Illegal Drug Buy-Bust Operation iti Brgy. 1 ditoy ciudad ti Laoag,
Nabigbig ti subject ti operasyon a ni Aaron Bolo, agtawen ti 19, estudyante iti Data Center College of the Philippines ken residente iti Barangay Dariwdiw iti ciudad ti Batac.
Basar kadagiti otoridad, naglako ni Bolo ti maysa a sachet a naglaon ti maipagarop a napagango a bulong ti marijuana iti nagpammarang kas poseur-buyer.
Nakumpiskar pay iti ikot ni Bolo ti maysa a pakete ti sigarilyo a naglaon metlaeng ti maipagarop a marijuana ken ti sangaribo a pisos a nausar iti operasyon.
Rumrumuar nga agdagsen ti 19 a gramo dagiti nakumpiskar a maipagarop a marijuana manipod ken ni Bolo.
Kabayatanna, naiget a naglikudan ni Bolo dagiti ebidensya a naala manipod kenkuana.
Inpetteng na a magmagna a mapan iti pageskwelaan na idi maipagarop nga adda ti nangsada kenkuana a pulis kalpasan na ket ginammatan ken pinosasan dan daytoy, kagiddan ti maipagarop a panangipabulsa dan ti illegal a droga.
Inpaganetget ni Bolo a naipabulsa laeng kenkuana dagiti nakumpiskar nga ebidensya gapu ta awan ti illegal nga aktibidad na.
