LAOAG CITY – Napasamak ti pammagkong iti Balatong Integrated School ditoy ciudad ti Laoag no sadinno a ti suspek ket maipagarop a Grade 10 idinto a ti biktima ket Grade 11.
Segun ken ni Mr. Jeremi Arrieta, School Principal iti Balatong Integrated School, maipagarop a ti nangilemmengan ti suspek ti immuko na ket iti underwear na.
Kuna na a basar iti imbestigasyon da, adda ti bukod a grupo ti suspek ken biktima, no sadinno a maipagarop nga adda ti saan da a nagkikinnaawatan a nangitunda iti insidente.
Gapu iti daytoy, inpasingked ni Arrieta nga ad-adda pay a paigetan da ti seguridad a maipatungpal iti nasao a pagadalan.
Mainaig iti daytoy, inyistorya ti maysa kadagiti estudyante a kabayatan ti panagriri ti dua a grupo ket maipagarop nga inruwar ti suspek ti balisong na no sadinno a kinarit met ti biktima nga ipadas na nga ibagsol no kabaelan na, banag nga inaramid met ti suspek.
Kuna pay ti saanen a nabigbig nga estudyante a kalpasan a nabagkong ti suspek ti biktima ket intedna ti balisong iti maysa a mangisursuro, kalpasan na ket adda met ti nangbugbog ti ulo na.
Iti agdama, naipasidong ti suspek iti City Social Welfare and Development ditoy ciudad ti Laoag idinto a ti biktima ket nagtalinaed iti Mariano Marcos Memorial Hospital and Medical Center iti ciudad ti Batac ngem addan iti nasayaat a kasasaad.
Kabayatanna, inbatad da Brgy, Chairman Joseph Bitagon iti Brgy 40, Balatong, Laoag City, ken ni Brgy. Chairman Rey Casimiro Menor iti Brgy 41, Balacad, Laoag City a masapol a manayunan ti bilang dagiti barangay tanud nga agbantay iti Balatong Integrated School kalpasan ti napasamak a pammagkong iti uneg ti nasao a pagadalan.
Immuna iti daytoy, naiyuswat ti taripnong nga iti nagbabaetan ti principal iti pagadalan, ti chief of police ditoy ciudad ti Laoag, City Disaster Risk Reduction and Management Council, dagiti barangay officials ken dadduma pay a maseknan nga ahensya ti gobierno mainaig iti napasamak a pammagkong iti Balatong Integrated School.
