LAOAG CITY – Natiliw ti maysa nga estudyante kalpasan nga inpukkaw na ti “fuck you” kadagiti kameng ti pulisya idiay ili ti Vintar.
Nabigbig daytoy a ni Jensen Agsunod, agtawen ti 18, katurturpos na laeng iti Senior High School ken residente iti Barangay 5 iti ili a Vintar.
Segun ti report, kadwa ni Agsunod dagiti tallo a papagayam na ken nakalugan da ti motorsiklo idi inpukkaw na ti ‘fuck you’ kadagiti kameng ti pulisya iti nasao nga ili.
Naamoan a ni Agsunod ket nag-OJT pay iti PNP-Vintar ken plano na ti mangala ti kurso a criminology.
Inadmitir ti estudyante a ti inaramid na ket bunga laeng ti kinabartek na ken saanna nga ammo ti inar-aramid na.
Kabayatanna, maladingitan ni Police Major Joseph Baltazar, ti chief of police iti ili a Vintar iti inaramid ni Jensen Agsunod ken dagiti tallo pay a kakadwa na nga agpapada a residente iti Barangay 5 iti nasao nga ili.
Inpetteng na a kabaelan da dagitoy bastusen uray naka-uniporme da ken iti pay mismo a kwerpo ti pulisya isut gapuna a mamati a nakarkaron no dagiti sibilyan.
Inpasingked ni Baltazar a bayat ti panag-OJT ni Agsanud ket napintas ti panangtrato da kenkuana.
Inbatad na pay nga iti baet a ni laeng Agsanud ti nagsao kadakuada ti dakes ket iraman da latta a pilaan ti kaso dagiti tallo a kakadwa na.
Innayon ni Baltazar nga adon dagiti nariribok a lugar a napnapanan na ngem awan dagiti nangbasbastos kadakuada a kameng ti pulisya, iti laeng ili ti Vintar.
