LAOAG CITY – Inbatad ti maysa nga estudyante a mabutengen a mapan sumrek iti pagadalan kalpasan a maipagarop a pinabainan ti subject teacher na iti San Nicola National High School iti ili ti San Nicolas.
Segun ken ni Von Andrei Gabriel, agtawen ti 15, sumagmamano nga aldaw a naglangan iti klase na gapu ta mapan sumsumrek nga ag-construction ken idi napan simrek ket inbaga ti mestro na a binigbig na a ni Mr. Vincent Vedaña iti kastoy “Ney adda kan ti ammok man no nailungon kan, rumuar ditoy no awan ti excuse letter yo, inkayo mangala ken adviser yo”.
Naamoan a ti nasao a mestro ket anak ti principal iti nasao a pagadalan.
Inbatad ni Von a napan iti pagnanaedan ti adviser na ngem awan daytoy ken saanen a nagsubli iti nangpabain kenkuana a mestro na gapu ta mabutengen.
Innayon na nga idi nagawid iti balay da ket indanun na iti ina na a ni Mrs. Mayolyn Gabriel ti napasamak.
Kuna ni Mrs. Gabriel a saanna a napan inreport ti napasamak iti principal iti nasao a pagadalan no di ket indanun na met iti balasang na a nagturpos met laeng iti nasao a pagadalan.
Gapu iti sakit ti nakem ti balasang na ket inpost na ti napasamak iti facebook account na no sadinno a possible a nabasa daytoy dagiti maseknan rason a pinaayaban da dagitoy iti opisina ti principal/
Inpalgak na nga inpagarop na a maurnus ti napasamak iti opisina ti principal ngem ad-adda laeng a nadegdegan ti sakit ti nakem da nga agina gapu ta maipagarop a binugka-bugkawan ti principal ti anak na ken pinawilan na pay daytoy a makiballaet.
Innayon na a naglikudan pay ti maak-akusaran a mestro ti alegasyon kenkuana ni Von ngem inpetteng ti estudyante a saan nga agswitswitik.
Inpakaammo na a sakbay a rimuar da iti opisina ti principal ket inpetteng na nga ipangato da ti napasamak ngem inbilin dagiti maseknan nga igawid ida ti gwardya ken saan da a parparwaren dagitoy.
Iti panangigawid ken maipagarop a panangguyud kenkuana ti gwardya ket adda ti naglammaan ti ima na a daytoy met ti nakita ti news team ti Bombo Radyo Laoag.
Inkari ni Mrs. Gabriel nga ilaban na ti karbengan ti anak na ken uray kenkuana isut gapuna nga iyuman na daytoy a banag iti maysa nga abogado tapno maamoan na no ania ti kasayaatan nga aramiden da.
Inpaganetget ti nasao nga ina a masapol a lumaban da uray marigrigat da laeng gapu ta kakaasi laeng ti sumaruno nga agbalin a biktima dagitoy.
Mainaig iti daytoy, inbatad ni Mrs. Gabriel a nasaysayaat no iyakar nan iti sabali a pagadalan ti anak na.
Kabayatanna, namin-ado a daras a tinawagan ti Bombo Radyo Laoag ti cellphone number ti nasao a principal ngem saanna pulos a sinungbatan.
