LAOAG CITY – Isagsaganan dagiti pulisya ti ili a Bacarra ti reklamo a maipila kontra ken ni Mark Marlon Ildefonso, agtawen ti 22, awanan asawa , estudyante ti Bacarra National Comprehensive High School ken residente ti Bgy. 9 Cabaruan ti nasao nga ili.
Daytoy ket kalpasan ti naimballigian a buy bust operation kontra iti nasao a suspek iti paset ti Bgy.1 asideg ti eskuwelaan na.
Segun ken ni P/Insp. Allan Dauz, Hepe ti Pulisya ti nasao nga ili, nabayagen a monmonituren da ni Ildefonso ngem ita laeng nga inwayat da ti nasao nga operasyon baaben ti nagpammarang a pulis a gumatang ti maipawil a droga.
Kuna na a naala da iti ikot na ti tallo a babasit a plastic sachet a naglaon ti mapapati a shabu ken ti marked money a 500 a pisos.
Inlawlawag ni Dauz a maibilang ni Ildefonso kadagiti nabigbig a kabarbaro a drug personality ti nasao nga ili a saan laeng nga aglako ngem ketdi agusar pay.
Mainaig iti daytoy, naglikudan met ni Ildefonso a kukua na dagiti naala kenkuana ken saan daytoy nga aglaklako wenno agus-usar ti aniaman a maipawil a droga.
Nagkedked met dagiti mangisururo iti nasao a pagadalan a mangted ti reaksiyon da kalpasan a naranaan ti Bombo Radyo a binisita da ti estudyante iti cuerpo ti pulisya.
