LAOAG CITY – Ballaigi ti naisayangkat a Search Warrant Operation kontra iti agnagan iti Susimo Arellano y Grande agtawen ti 64, addaan ti asawa ken residente ti Bgy. Puttao iti ili ti Solsona.
Segun ken ni P/Insp. Ralph Dayag, Hepe ti Pulisya ti nasao nga ili, inwayat da ti nasao nga operasyon kalpasan a nakaawat da ti impormasyon a ni Grande ket maipagarup a kameng ti “gun for hire” a ti operasyon da ket saan la nga iti Ilocos Norte ngem ketdi iti Cagayan, Bulacan ken Pampanga.
Kas resulta ti nasao nga operasyon, nakaala dagiti pulis ti maysa a kalibre 38 revolver a paltog, balbala ti kalibre 22, armalite, madumaduma a gamit ti suldado, garapon a naglaon iti puraw a substance a maatap a shabu ken marijuana.
Kuna ni Dayag nga uray awan ni Grande idi iwayat da ti operasyon ket ipila da ti kaso kontra iti daytoy.
Dagitoy ket ti panagsalunagsing ti RA 10591 ken RA 9165.
Kuna na nga nga adda met ti asawa na a ni Luzviminda, ti anak na ken dagiti opisyal ti barangay a nangimatang iti operasyon.
Inlawlawag pay ni Dayag a ni Arellano ket maysa nga ex-convict.
