LAOAG CITY – Kinumpirmaran ni Police Senior Inspector Eddie Suyat, ti chief of police iti Paoay, Ilocos Norte nga adda ti maysa nga hand grenade a nakita ti maysa a residente idiay Barangay Bacsil ti nasao nga ili.
Iti eksklusibo nga interview ti Bombo Radyo Laoag ken ni Suyat, inbatad na nga iti panagturong ni Ofelia Trinidad iti talon da ket nakita na ti nasao nga hand grenade.
Inbatad na nga intawag da a dagus daytoy iti opisina da ken iti panagturong ti Explosive Ordnance Disposal Team iti Ilocos Norte Police Provincial Office (INPPO) nga idadaulwan ni SPO3 Arnold Juan ket naamoan a ti nasao nga hand grenade ket aglatlatin ken dandanin bumtak.
Daytoy ket gapu ta idi iggaman ni Juan ti nasao a granada ket napudot daytoy isu a kasapulan nga intaneb da iti nalamiis a danum.
Inlawlawag ni Suyat a gapu iti estado ti nasao a granada ket uray saan a maikkat ti ‘pin’ na ket mabalin a bumtak daytoy.
Iti agdama, addan iti kustodyar ti EODT ti nasao nga hand grenade.
