Saan a mamati ni Dr. Alan Taylan, ti St. Camillus De Lellis Hospital ditoy siudad ti Laoag a mangitunda ti pannakatay ti vaginal lock wenno ti saan a panagsina ti mabagbagi ti lalaki ken babai kabayatan nga agnanaig dagitoy.
Segun kenkuana, adda ti makunkuna a vaginismus wenno ti alisto a panagkeppet ti mabagbagi ti maysa a babai ken saan a dagus a maiserrek ti mabagbagi ti lalaki iti daytoy.
Nupay kasta, inlawlawagna a temporario laeng daytoy gapu ta lumukayto met laeng ti mabagbagi ti babai rason a maikkatto met laeng ti mabagbagi ti lalaki.
Inbatadna a daytoy ket maaw-awagan iti medical term a penis captivus wenno ti mabagbagi ti maysa a lalaki ket maipit iti uneg ti mabagbagi ti babai ngem apaman a bumayag ket aglukay met laeng daytoy.
Kunana a masapol laeng nga agrelaks dagiti dua nga indibidual kabayatan ti panagnaig dagitoy tapno saan a mapasamak kadakuada daytoy a banag.
Inpalgakna a manmano laeng daytoy a mapasamak iti intero a lubong gapu ta posible ket adda pay ti sabali a rason ti pannakatay dagiti maseknan nga indibidual kas ti marikrikna a sakit.
Mainaig iti daytoy, kuna ni Dr. Taylan nga awan ti pakainaigan ti tawen dagiti maseknan a nagnaig iti nasao a kondision.
Innayonna a masapol ti nainayad a panagnaig ti dua a maseknan tapno maliklikan a masaktan ti babai nangruna no damona a makinaig ken malappedan ti panagdanagna.
Kabayatanna, naammoan nga iti naunday a panawen nga agserserbi isuna kas doktor iti bukudna nga ospital ket awan pay ti nagbalin a kapadasanna nga adda ti naitaray iti ospitalda gapu iti vaginal lock.
Immuna iti daytoy, napagsasaritaan iti lubong ti online dagiti dua nga indibidual a maipagarup a nakapasar ti vaginal lock kabayatan ti panagnaigda.
