LAOAG CITY – Inbutaktak ti maysa nga amateur historian nga umabot iti agarop 800 a maladaga ti naitabon iti mass grave iti pagtaengan nga imanmanihir ti simbaan idiay Ireland para kadagiti inna nga awanan ti asawa.
Naamoan a ti nadakamat a lugar ket nagnaedan ti rinibo a babbai ken dagiti annak da iti nagbaetan ti 1925 ken 1961.
Basar iti report, naruay a babbai ti nagsikog a saan pay a naikasar a nangitunda met ti panangilaksid ti bukod da a pamilya no sadinno a dagiti dadduma ket saan da metlaeng a nakadenna ti inpasngay da a maladaga.
Gapu iti nagbalin a rebelasyon ti historian ket naibilin a dagus ti pannakakali ti lugar no sadinno a marugyan ita nga aldaw.
Mapatta-patta nga agpaot ti dua a tawen ti panagkali iti nadakamat a lugar.
