LAOAG CITY – Inadmitir ni Mr. Jhon Rey Salud, maysa nga hog raiser iti Barangay Salsalamagui iti ili ti Vintar nga adda ti panagamak na iti pannakaiyakar dagiti baboy a naggapo iti Barangay Dipilat gapo iti kaso ti African Swine Fever (ASF).
Segun kenni Salud, dagiti baboy a naiyakar iti barangay da partikular iti asideg ti piggery na ket napapatay ken naikali met laeng.
Nupay kasta, kunana a maipagarop a narabaw ti pannakaikali dagiti napatay a baboy ken rumrumuar a saan a nakasuot ti PPE dagiti nagikali.
Kalpasan daytoy, inbatad na a tinawagan na ti opisina ti Municipal Agriculture Office ken ditoy a naamoan na a maiparit daytoy.
Nupay kasta, kunana a basar kenni Dr. Myrna Simon ket pinirmaan na ti sertipikasyon gapo ta immamong met ti kapitan.
Gapo iti daytoy, kunana a nagturong isuna kenni Dr. Loida Valenzuela, Provincial Veterinarian ken naamoan na a saan met nga umanamong daytoy iti pannakaiyakar dagiti baboy.
Mainaig iti daytoy, inbatad ni Barangay Tanod Noel Cadang nga inkali da dagiti baboy kas panangsurot met laeng iti bilin kadakuada dagiti empleado ti Agriculture Office.
Inpalgak na a nagpaasistir dagiti maseknan kadakuada ken tinulungan da ida a nagikali kadagiti baboy a naggapo iti Barangay Dipilat.
Kabayatanna, agpapan maisursurat ti damag ket ur-urayen ni Salud ti pannaka-disinfect ti piggery na.
