LAOAG CITY – Nabigbig kas first-ever Filipino a nagballigi iti Red Bull Basement World Championship ni Mr. Aldrin Sojourner “Soj” Gamayon a residente iti ili ti San Nicolas.
Ti Red Bull Basement ket maysa a global competition idiay Tokyo, Japan nga iprisentar dagiti young innovators dagiti business plans-da tapno mapadur-as ti lubong babaen ti artificial intelligence.
Segun ken ni Gamayon, adda ti 110 a ribu nga ideya ti kinalabanna manipud iti 40 a pagilian iti intero a lubong pakairamanan ti Estados Unidos ken Europa.
Inbatadna a nagun-odna ti pammigbig gapu iti inaramidna nga “AgriConnect” a maysa nga agriculture tracking app a mangtulong kadagiti mannalon a mangmonitor kadagiti mulada iti baet ti kaadayona tapno umadu ti apitda.
Inlawlawag ti Ateneo University student a ti nagbalin nga inspirasionna ket ti rice-farming family daytoy.
Innayonna a saanna a ninamnama nga isuna ti maiyawag a nangabak iti naindaklan a kompetision.
