LAOAG CITY – Manamnama a dumatag iti US District Court intono Mayo 15 ita a tawen ti maysa a book keeper nga Ilakano kalpasan a napilaan ti kaso a wire fraud.
Nabigbig daytoy a ni Thelma Pascua Suyat, tubo ditoy Ilocos Norte ken agnanaed idiay Kahului, Maui.
Iti report ni Bombo Correspondent Manny Pascua idiay Hawaii, daytoy ket gapo iti maipagarop a panangtakaw na iti 1.3 a milyon a dolyar iti dati a pagpapaayan na a nursery idiau Maui.
Kunana a basar ti reklamo ti agtagikua, ni Suyat ket simrek iti nursery idi 2004 ngem maipagarop a nangrugi ti maanomalya a panangusar na ti pondo ti nursery manipud 2008 agingga iti 2016.
Naamoan a nadlaw ti agtagikua a bumasbassit ti costumer da ken bumasbassit dagiti lako da ken gapo ta agdudua kenni Suyat ket nangala ti abogado para iti forensic accounting ken ditoy a naduktalan a maipagarop nga inusar na ti kwarta ti kompanya a pinagbayad kadagiti credit card ken para iti binulan a bayad ti pagtaengan da.
