LAOAG CITY – Saan a ninamnama ni Nicole Louise Poblete, tubo iti Brgy. Buttong ditoy ciudad ti Laoag nga agbalin daytoy a summa cum laude iti maysa nga unibersidad idiay Bangkok, Thailand.
Kunana a ti laeng gagem na ket agbasa ken aramiden na amin ti kabaelan na a makalpas iti kurso na a Bachelor of Arts in Mass Communication, major in Radio and TV Broadcasting iti Ramkmhaeng University Institute of International Studies iti nasao a pagilyan.
Segun kenni Poblete, nakigtot daytoy idi naala na ti transcript of record na a mangibagbaga nga isuna ket suma cum laude, gapo ta saan na nga ammo nga adda ti Latin Honors ti nasao nga unibersidad.
Nupay kasta, kuna na a nakagasgasat gapu ta nagun-od na ti pammadayaw ti baet dagiti pannubok a sinango na.
Inbatad na a sabali ti kultura ken pagsasao iti nasao a pagilyan ngem nagun-od na latta ti grado a 3.9 tapno agbalin a summa cum laude.
Ni Poblete ket nagbasa iti nadakamat nga unibersidad kalpasan a nagnaed ti pamilya na idiay Thailand kas misyonaryo.
Nagbalin nga inspirasyon ni Poblete ti pamilya na gapo kadagiti sakripisyo da iti panagadal na ken tapnu maited amin dagiti kasapulan na ken dagiti dua pay a kakabsat na nga agbasbasa met laeng iti nasao a pagilyan.
