LAOAG CITY – Nasakit ti nakem ni Mrs. Roselie Pescador Tagudin iti Barangay Palonpong iti ciudad ti Batac kalpasan nga adda dagiti saan pay a nabigbig nga indibidual a nangtubtub iti pantyon ti anak na a ni Angel Heart Tagudin a naitabon laeng iti Pebrero ita a tawen.
Inlawlawag ni Mrs. Tagudin a napasamak daytoy iti mismo a kasangay ti anakna.
Kuna na a mismo nga iti batog ti bag ti anakna a nangikabilan na kadagiti personal a gamit na ti nangabotan dagiti suspek.
Inpakaammo ni Mrs. Tagudin a karaman kadagiti napukaw ket ti nakurang 3 ribo a pisos a kwarta nga inpabalon na iti anakna ken dagiti dadduma a personal a gamitna.
Mainaig iti daytoy, inbatad ti ina a Tagudin nga inreport da met a dagus ti napasamak iti Philippine National Police iti ciudad ti Batac.
Kuna na nga iti panangimbestigar dagiti kameng ti pulisya kadagiti uppat a supulturero iti kamposanto ket naiget a naglikudan da nga isuda iti adda iti likudan ti napasamak.
Nupay kasta, kuna ni Police Lt. Col Adrian Gayuchan, ti chief of police iti Philippine National Police iti ciudad ti Batac a maikonsiderar latta a suspek dagiti nasao a supulturero isut gapuna nga iyuswat da pay ti naun-uneg nga imbestigasyon.
