LAOAG CITY – Inbatad ni Mr. Sonny Bumanglag iti Barangay Juan iti ili ti Solsona a lima nga aldaw kalpasan a nabakunaan iti umuna a dose ti Sinovac ti asawa na ket kellaat lattan a nagkapsot ken nagid-idda a nagmalmalem gapu ta saanna a kabaelan ti bumangon.
Inlawlawag na a mapan da koma ikabil iti Rural Health Unit (RHU) iti ili ti Solsona ngem inbaga ti asawa na a kasapulan na laeng ti aginana no sadinno nga iti kabigatan na ket bimmangon met laeng.
Nupay kasta, iti sumaruno nga aldaw ket nagtagtagerger ni Mrs. Bumanglag isut gapuna nga intaray da daytoy iti Piddig District Hospital iti ili ti Piddig ngem isu metten ti pannaka-stroke na.
Gapu iti daytoy, inpakaammo ni Mr. Bumanglag nga intaray da ni Mrs. Bumanglag iti Taylan Hospital, ngem gapu ta saan da a kabaelan ti kadakkel a magastos ket nakisarita da nga iyakar da iti Mariano Marcos Memorial Hospital and Medical Center iti ciudad ti Batac.
Inbaga ni Mr. Bumanglag a kas protocol iti ospital iti ciudad ti Batac ket naipadalan ti RT-PCR test ti asawa na ket positibo ti resulta na.
Innayon na a nagtalinaed ti asawa na iti ospital manipod iti Hulyo 13 agingga iti Hulyo 23 gapu ta basar kadagiti nangtaming a doktor ket nadaraan ti utek na ken kritikal daytoy.
Saan met a patien ni Mr. Bumanglag a gapu iti naitudok a sinovac vaccine ti makaigapu iti panagkapsot ti asawa na no di ket mabalin a saan laeng a kinabaelan ti bagina gapu ta nakapsot ti resistensya na no sadinno a malaksid nga adda ti high blood na ket diabetic pay daytoy.
Iti baet ti napasamak ken ni Mrs. Bumanglag, nagpanawagan ni Mr. Bumanglag iti publiko a saan nga agbuteng nga agpabakuna kontra iti covid-19 virus.
Adda metten iti nasayaat a kasasaad ni Mrs. Bumanglag ngem agtultuloy pay laeng ti panagagas na.
