LAOAG CITY – Kalikagumanen ti maysa nga ina a nakisinan iti asawa na a nagipatpatulod ti kuwarta iti naam-amo na laeng babaen iti social media a mapasubli dagiti inpatulod na a kuwarta nga immabot ti agarup 60 a ribo a pisos.
Kuna ti ina nga agtawen ti 59 ken taga Sta. Maria, Bulacan a nagkiddaw a saan a maipatpatangatang ti kinasiasino na bayat a personal a dimmatag ditoy Bombo Radyo a saan na met pay ketdi a marikna a nalokon daytoy ngem kayat na laeng a mapasublin ti nasao a kantidad gapu ta masapul na ken ung-ungtanen dagiti annak na.
Inlawlawag na nga adda agarup 3 a tawen a nagam-ammo na ti nagpabigbig a ni Lima Olivera iti Kanzaz, Canada nga iti agdama ket adda idiay 12 Agazar St. New Delhi, India.
Kuna na nga ita laeng nga inaramid na ti agipatulod ti kuwarta babaen iti remmitance tapno ilukatan na ti acount para iti panagpatulong na iti sakit na iti dalem ken tapno mapatuludan na met ti kuwarta babaen iti nagan nga Austin Jideofor a Manager ti Bangko idiay India.
Kuna ti ina a nami-uppat a daras a nagipatulod ti kuwarta, namitlo a daras itay Enero ken naminsan itay Pebrero iti daytoy a tawen.
