LAOAG CITY – Kwinestionaran ni Mrs. Jemma Salapungol ti listaan ti PBBM Scholar iti Barangay 18 San Isidro iti ili ti Sarrat.
Segun kenkuana, inisial a karaman ti anakna iti listaan kadagiti lima a maipaayan ti scholar.
Immunan iti daytoy, adda naiwayat nga interview kadagiti nagaplikar ket ditoy a naduktalan a ti anakna ket adda nagan na iti CHED Tertiary Education Subsidy (TES) a kunana nga idi pay laeng second year daytoy ken naladaw na a naawat ti nasao nga scholarship.
Gapu iti pannakaduktalda, na-interview ni Mrs. Salapungol iti barangay hall ket inkiddawna a no mabalin ket ti kasasaad ti panagbiag ti pangkitaanda ken saan ketdi a ti scholarship a saan pay pulos a naawat.
Kalpasan dagiti napasamak nga interview, inlawlawag ti barangay da a dumalan pay daytoy ti pannakatingiting.
Idinto a rimuar ti pinal a listaan dagiti kualipikado a maipaayan ti scholar, awanen ti nagan ti anakna.
Naamoanna nga adda ti dua nga estudiante a nailista a maipaayan ti scholarship a kabagyan ni kapitanda no sadinno a segun kenkuana, dagitoy ket adda kabaelanda nga agadal basar iti kasasaad ti panagbiagda.
Masdaaw ni Mrs. Salapungol iti kellaat a pannakaikkat ti nagan ti anakna no sadinno nga inladawanna a dagiti naala a kabagyan ni kapitan ket napintas ti kasasaad ti biagda no maikumparar iti panagbiagda.
Kalikagum ni Mrs. Salapungol ti pannakailawlawag ti nasao a problema gapu ta kunana a saan nga amin ket kabaelan ti agpaadal nangruna ta makamula da laeng ti nateng no tiempo ti panagtutudo ken awanen ti sabali a namnamaenda ken lakayna.
Kabayatanna, ti pannakisarsarita ti Bombo Radio ken ni Barangay Captain Jeremy Ramos, kinunana nga inarisit da a nasayaat ti listaan kadagiti kualipikado a maipaayan ti scholarship.
Innayonna a silulukat ti barangayda tapno ilawlawag ti nasao a problema ni Mrs. Salapungol mainaig ti pannakaikkat ti anakna kas maysa a benepisiario ti PBBM Scholar.
