LAOAG CITY – Inbatad ti anak ti biktima ti pammaltog a ni Flordeliza Salvador, 47, addaan ti live in partner iti Barangay Hilario iti ili ti Banna nga adda ti nakita na a lalaki sakbay ti krimen.
Segun iti agtawen ti siyam nga ubing, nakabado ti nangisit, nakapantalon ket nakaabungot ti suspek ngem saan na nga ammo nga adda ti paltog daytoy.
Inlawlawag na a nakita na ti lalaki a nakatakder nga agsipsipot ngem saan na nga inbaga iti ina ken ama na.
Kunana a sakbay pay a maisaksak ti biktima ti silaw ket napaltoganen ken ti laeng bala ti paltog a nausar ti nakita nan.
Naamoan a ti nakakitaan ti ubing iti ibagbaga na a suspek ket adda ti mabalin a paglingedan na a kawayan ken pagpupukan ti manok.
Mainaig iti daytoy, inlawlawag ni Mrs. Eva Grace Arnida, kabsat ti biktima ti nga awan ti rason nga agimon ti biktima kenkuana.
Segun kenni Arnida, isakit na laeng ti ina da gapo ta iti maipagarop a panangkabkabil ti biktima ti ina da agingga a nablo ti bakrang ti maseknan.
Inbatad na a gapo iti sakit ti nakem na ket inwara-wara na ti gamit ti biktima.
Inpetteng na pay a malaksid iti inaramid na iti ina da ket makisinnungbat kadagiti karruba da no mabartek.
Malaksid iti daytoy, kuna ni Arnida a no mabartek ket mapan agdawat ti kwarta, agarakop ken agkamat ti lallaki ngem mapaspasensyaan.
Nupay kasta, nagpawanagan ni Arnida iti suspek a sumuko gapo iti inaramid na iti kabsat na.
Kabayatanna, inlawlawag ni Police Major Arnel Tabaog, ti chief of police ti PNP-Banna a saan da py a maibuksilan iti publiko ti nagdur-asan ti imbestigasyon da seknan iti pannakapalto-paltog ni Salvador.
Segun kenni Tabaog, agpokus ken lippasen da pay laeng ti imbestigasyon da nupay adda ti makitkita dan a mabalin a motibo iti krimen ken saan da nga ilaksid ti riri ti pamilya ti biktima.
Inbatad na a basar iti agtultuloy nga imbestigasyon da ket nakangeg dagiti sumagmamano a tattao ti danarudor ti motorsiklo sumagmamano a minutos kalpasan ti pammaltog.
Kunana a ti nausar a paltog ket 9MM ken saan na pay a maibaga ni miembro ti gun for hire ti suspek gapo ta ulo kuma ti pinuntirya ti gunman.
Naamoan a dua laeng a metro ti kaadayo na ti nakapasamakan ti pammaltog iti nakarekobrean da ti basyo ti paltog.
Malaksid iti daytoy, kuna ni Tabaog nga addan ti ibilang da a suspek ngem saan na pay laeng nga idetalye gapo ta agkalap da pay laeng ti pammaneknek wenno ebidensya.
